Черногорияның Будва қаласында өткен бокстан «Адриатика жауһары» халықаралық турнирінің финалдық жекпе-жектері қазақстандық спортшылар үшін сәтті аяқталды. 66 кг салмақ дәрежесінде шешуші айқаста Ақбота Есімбекова жеңіске жетіп, алтын медаль иеленді. Финалда ол отандасы Айсұлу Мұхитпен кездесіп, тартысты жекпе-жекте өзінің мықтылығын дәлелдеді.
Жыл сайын ұйымдастырылатын бұл беделді турнир 17-18 жастағы әлемнің ең үздік жас боксшыларын жинайды. Биылғы додаға 20-дан астам елден 270 спортшы қатысып, 13 ерлер және 12 әйелдер салмақ дәрежесінде жүлделі орындар үшін таласты.
Қазақстандық боксшылардың халықаралық деңгейдегі жетістігі – олардың табанды еңбегінің, жоғары дайындық деңгейінің және еліміздегі бокс мектебінің күштілігінің айқын дәлелі. Ақбота Есімбекованы жеңісімен құттықтаймыз!
